Un proxecto industrial recorre Galiza da man da multinacional portuguesa Greenfiber (Altri 75% do total) e da empresa Greenalia (25%) , apoiadas dende o primeiro momento pola Xunta de Galiza que se envorcou en declaralo no ano 2022 “Proxecto Industrial Estratéxico”, mesmo sen coñecer o que ofrecía ou quizá coñecéndoo pero ocultándoo. Proxecto hoxe de macrocelulosa con algo de fibra lyocell que aspira á axudas de 250 millóns a fondo perdido de Europa con Next Generation EU. As altas emisións atmosféricas, o gran volume de auga que utiliza (46.000 m3 diarios), os vertidos de auga contaminada (ao Rio Ulla e Ría de Arousa), os residuos, o consumo de 1,2 millóns de m3 de eucalipto na Fase I...fannos pensar que a Portugal non lle interesou por eso Altri busca emprazarse na Galiza.
O complexo industrial que Greenfiber e Greenalia quere instalarse en Palas de Rei para fabricar 400.000 toneladas/ano de celulosa soluble e 200.000 toneladas/ano de fibra téxtil, Lyocell, traería asociada emisións directas á atmosfera, elevadísimas para calquera industria:
• 252,5 toneladas/ano (t/ano) de partículas PM10
• 577,58 t/ano de óxido de xofre (SO2)
• 2.180,9 t/ano de óxidos de nitróxeno (NOx) e
• 53,22 t de TRS (compostos volátiles reducidos de xofre como sulfhídrico).
• Descoñecemos outras emisións (CO2 por exemplo) aínda que as celulosas emiten máis de 15 contaminantes problemáticos a atmosfera e mesmo Altri non coñecemos as emisións difusas .
Si comparamos as emisións de óxidos de nitróxeno coas que se declaran as industrias no PRTR, Rexistro Estatal de Emisións e Focos Contaminantes, comprobamos que no Pais Vasco ningunha industria declara tal cantidade de óxidos de nitróxeno (Petronor sería campión con 1.673 t/an). En Cataluña tan só Repsol de Tarragona se aproximaría con 1.622 t/ano e o mesmo sucedería na Comunidade Valenciana, BP energia estaría lonxe con 1.280 t/ano. Si se comparan os óxidos de nitróxeno que emiten as industrias galegas, Altri superaría a 128 complexos que declaran no PRTR sendo a primeira hoxe Tableros Intasa cunhas emisións de 2.150 t/ano.
A industria da celulosa está considerada como unha das máis contaminantes, Altri-Greenalia utilizaría diversidade de produtos químicos propios da tecnoloxía Kraft , citan no proceso de branqueo (TCF sin cloro) ao ácido sulfúrico, ozono, sosa cáustica. peróxido de hidróxeno, sulfato de magnesio.... e para fabricar Lyocell para tratar a pasta unha amina, NMMO (óxido de N- metíl-morfolina) e ácido sulfúrico, sosa cáustica e aditivos.
Podemos comparar as emisións atmosféricas do proxecto de Altri para Palas de Rei en Lugo con Altri en Portugal e sorpréndenos o seguinte:
- Altri na Galiza emitiría en partículas 0,63 kg/t de pasta fabricada, mentres Celbi (produce 400.000 t/ano) da mesma Altri en Portugal emite 0,16 kg/t e todo o Grupo Altri con tres celulosas emite de media 0,2 kg/t. Cando analizamos as emisións de óxidos de nitróxeno Altri na Galiza quere emitir 5,45 kg/t pero multiplica aquí por máis de 5 as emisións en Kg/t de Portugal (1,09 kg/t en Celbi e 1 kg/t no conxunto do Grupo). Algo similar ocorre cos óxidos de xofre (SO2) que en Portugal son 0,05 kg/t de pasta na celulosa Celbi (Figueira da Foz) e ate 0,1 kg/t todo o Grupo Altri , e aquí pretende emitir 1,44 kg/por tonelada e pasta fabricada . O resultado é que todo o Grupo Altri emite 157,4 t/ano de partículas, 1.120,7 t/ano de óxidos de nitróxeno e 85,6 de óxidos de xofre fronte a 252,5t/ano, 2.180,9 e 577,58 t/ano do proxecto de Palas.
- No caso da celulosa de The Navigator Company (produce 649.193 t/ano) tamén presenta menos emisións totais en óxidos de nitróxeno que as que pretende emitir Altri na Galiza 1.737 t/ano fronte a 2.180,9 en Altri de Palas de Rei e en óxidos de xofre emite 83 t/ano cando Altri emitiría 577,58 t/ano
Non parece que valoraran o impacto na saúde e no medio ambiente, vexamos só pequenos detalles: Os compostos de nitróxeno asócianse con enfermidades respiratorias como asma, síntomas respiratorios (tos, sibilancia,dificultades para respirar...). O dióxido de xofre irrita a pel, as mucosas e os pulmóns, mesmo orixina tos, irritación na gorxa.. e ambos óxidos convértense na atmosfera en ácidos que orixina a choiva ácida que prexudica aos materiais e a vexetación, bosques, determinados cultivos, á apicultura, á agricultura ecolóxica ( presente na zona)... As partículas PM 2,5 (que Altri non cita pero que emite) están consideradas pola OMS como un dos principais indicadores de contaminación, penetran nos pulmóns e pasan ao torrente sanguíneo e están relacionadas con enfermidades cardíacas -arritmias, infartos...- enfermidades respiratorias, cerebrais – ictus-, neurodexenerativas e mesmo inflúen na diabetes e hipertensión.
Ante todo isto pregúntome : 1. Como se pode posicionar o Goberno Galego a favor deste macroproxecto contaminante ?. 2. Terá relación este posicionamento da Xunta coa presencia de ex-altos cargos (Conselleira) en Greenalia socia de Altri ? Aceptaría Portugal un proxecto tan contaminante como o que presenta Altri aquí ou mesmo xa o rexeitou anteriormente ?
Cadro I. Comparación entre as celulosas portuguesas (altri e Navigator) co proxecto Altri na Galiza.. Emisións en toneladas/ano e Kg/t
